VIGAN CITY – Kaso nga adultery ti maipila a kaso kontra iti maysa a lalaki ken ti maysa a babai a naasawan idiay Nagbukel gapu ti pannakaduktal kadakuada nga agnanaig.
Napan ti biktima wenno ti asawa a lalaki iti Nagbukel Police Station tapno ireport kadakuada ti misisna a naduktalanna a nakirelasyon iti sabali a lalaki.
Naka-quarantine idiay Manila idi January ti biktima ta kagapgapuna iti sabali a pagilian ta maysa nga OFW idin ta impakaammo ti kakabsatna a babbai babaen iti messenger a ti asawana ket adda karelasyonna a sabali.
Idi nakasangpet ti biktima iti pagtaenganda kalpasan a dimmalan iti mandatory quarantine iti bigat ti February 12, naaktuanna nga agkakaidda ti misisna ken ti kabitna nga awan ti kawesda a dua ken agbinbinnisito iti maysa a kuarto.
Numan pay inamin ti misis ti biktima a masikug ket ti kabitna ti ama, sisasagana latta met ti biktima a mangawat kenkuana ken mangisalbar iti pamiliada ngem pinili ti misisna nga ituloy ti relasyonda ti kabitna.
