VIGAN CITY – Natay ti maysa a miembro ti Communist Terrorist Group iti engkwentro kadagiti suldado idiay Malibcong, Abra.
Segun ken ni Captain Bryan Albano, information officer ti Civil Military Office ti 501st Infantry Brigade, nagpaot iti sangapulo ket lima a minutos ti engkwentro iti nagbaetan ti komunista a grupo ken dagiti suldado ti 24th Infantry Battalion iti Sitio Lamunan, Barangay Gacab.
Innayon ni Albano a kalpasan ti panaglibas dagiti rebelde ket naisayangkat met ti clearing dagiti suldado a nakakitaanda iti natay a miembro ti komunista a grupo a daytoy ket nagsagaba iti tama ti bala ti paltog.
Naala manipud iti natay a rebelde ti M4 assault rifle ken M14 ken dagiti bala, submersive documents ken medical supplies.
Mamati ni Albano nga adda met dagiti nadundunor kadagiti armado a grupo gapu ti tugot ti dara a nakitada iti lugar.
Immunan a nangisayangkat iti security patrol ken clearing dagiti suldado idi naipadanun kadakuada ti sumagmamano a residente a nakitada dagiti armado a grupo iti nasao a lugar.
