VIGAN CITY – Dua nga insidente ti panagpakamatay iti napasamak ti probinsia basar ti report manipod ti Ilocos Sur Police Provincial Office.
Immuna a napasamak ti insidente idiay Brgy.Cabaroan Daya, Vigan City ket nabigbig ti biktima a ni Ryan Leslie Abinsay, agtawen ti uppat a pulo ket tallo ken agnaed ti nasao a barangay.
Basar ti report manipod Vigan City Police Station, impakammu kadakuada ti kabsatna a ni Terrence Abinsay nga agsagsagaba ti depresyon ti kabsatna ket naudi a nakitada idi kalman alas dose ti tengnga ti rabii ket iti kamalemanna nasarakanda laengen nga awan ti biagna a nakabitin.
Simmaruno a napasamak ti insidente ti panagbekkel idiay ili ti Sta. Maria ken ti biktima ket lalaki nga agtawen ti sangapulo ket innem a grade 10 student.
Segun ti PNP, nagaramat ti nylon ti biktima nga inggalotna ti kawayan a masarakan iti asideg ti paglutwanda ket naduktalan laengen ti amana a nakabitin ti biktima.
Iti agdama, saan pay laeng nga ammu ti PNP iti rason iti panagpakamatay ti biktima.
