Nadunor ti maysa a mannalon gapu iti panangpaltog kenkuana ti padana met laeng a mannalon idiay Barangay San Tiburcio, Salcedo, Ilocos Sur idi rabii, December 23, 2025.
Ti biktima ket lalaki nga agtawen iti tallopulo ket tallo, naasawaan nga agnaed idiay San Tiburcio, Salcedo idinto a ti suspek ket agtawen iti uppat a pulo ket walo nga agnaed met laeng iti nasao a lugar.
Nakaawat ti Salcedo Municipal Police Station iti tawag maipanggep iti napasamak a pammaltog iti nasao a lugar isu a nagrespondeda.
Idi nakadanonda iti nakapasamakan ti pammaltog ket naipanen ti biktima iti Ilocos Sur District Hospital-Salcedo para iti pannakatamingna kalpasan a pinaltogan ti suspek, nga immunan a nakasinnungbatna gapu iti napigsa a videoke iti nasao a lugar.
Naammoan a ti inaramat ti suspek ket improvised 12-gauge shotgun, nga isu met iti insukona iti Barangay Kapital iti lugarda.
Gapu iti isusuko ti suspek ket nakakustodiya ita iti Salcedo Municipal Police Station tapno sangwen ti kaso a maipila kontra kenkuana.
