Pimmusay bayat ti pannakatamingna ti maysa a lalaki a biktima iti pammaltog idiay Barangay Jordan, Sinait.
Nabigbig ti biktima a ni Amado Idica Yoro, agtawen iti limapulo ket innem, maysa a mannalon.
Ti suspek ket ni Jual Bautista Yoro, agtawen iti tallopulo ket walo, agnaed iti nasao a lugar.
Alas tres iti malem ti Hulyo 18, bayat ti panagay-ayam ti putot ti suspek ken apo ti biktima iti paraanganda ket rimsua ti saan a nagkinnaawatan dagiti dua nga ubbing.
Nakita ket inanawa ida ti suspek ket bayat ti pananganawana kadakuada, nakita ti biktima nga ung-ungtan ti suspek ti apona isu a napan iti ayanda ket nagdinnanug ti biktima ken suspek.
Nagawid ti biktima a nangala iti buneng kadua ti apona, ket kinaryar ti biktima ti suspek.
Gapu dayta, nangala ti suspek it caliber 38 nga adda lima a balana ken maysa a fired cartridge case a naikabil iti cylinder a pinangpaltogna iti biktima, a nakapuntaan iti akin-kannigid a paset ti tengngedna.
Naipaagas ti biktima iti Sto. Cristo Milagroso Hospital para iti pannakatamingna ngem saanen a nakalasat.
Nakemmeg met ti suspek babaen kadagiti nagresponde a kapulisan.
