VIGAN CITY – Kaso nga attempted homicide iti sangwen ti maysa a mannalon gapu iti panagpaputokna iti paltog iti maysa met laeng a mannalon idiay Brgy. Zapat, Sinait, Ilocos Sur.
Segun ti Sinait Municipal Police Station, ti biktima ket ni Jerry Calibuso Ines, agtawen ti uppat a pulo ket pito, mannalon nga agnaed iti nasao a lugar idinto a ti suspek ket ni Jomar Sagap Abella, agtawen ti limapulo ket dua, mannalon nga agnaed iti isu met laeng a lugar.
Nakaawat ti tawag dagiti pannakabagi ti linteg inaig ti illegal a panagpaputok iti paltog ti suspek iti nasao a lugar ket naamoan a bayat ti panagiwayway ti kalding ken baka ti biktima a ni Ines ket immasideg ni Abella a marurod ken mapapati a pinaputokanna iti paltog ti biktima iti namin-lima a daras ngem saan a napuntaan.
Iti insayangkat a hot pursuit operation ti Sinait Police Station ket balligi a nakemmeg ti suspek iti pagtaenganda ken naipan iti Ilocos Sur District Hospital – Sinait ngem naiyakar met laeng iti Sinait Police Station para iti proper disposition.
