VIGAN CITY – Dead on the spot ni Ciriaco Realon, agtawen iti innem a pulo ket pito, mangngalap nga agnaed iti Barangay San Sebastian, San Vicente gapu iti panangpaltog dagiti saan pay a nabigbig a suspek.
Nakaawat iti tawag dagiti pannakabagi ti linteg nga adda napasamak a pammaltog iti nasao a barangay ket idi madanunda ti nasao a lugar, maysa a witness ti nangibaga a nakangngegda iti lima nga agsasaruno a putok iti paltog.
Iti pannaki-uman ti Bombo Radyo Vigan ken ni Police Major Darwin Julian, agpapadaya ti biktima a nakalugan iti motorsiklona a mapan koma iti pupukanna idin ta dua a suspek a nakalugan iti Yamaha Black Aerox motorcycle a nakasuot iti black helmet ti nangpaltog kenkuana.
Gapu dayta, nagsagaba iti uppat a tama iti bala ti bukotna a puon ti nakatayanna.
Dagiti met suspek ket dagus a naglibas kalpasan ti panangpaltogda iti biktima.
Caliber 45 ti mapapati a paltog a naaramat kas maibasar kadagiti lima nga empty shell iti nakapasamakan ti krimen.
Iti agdama, agtultuloy ti panangsapul dagiti pannakabagi ti linteg iti witness ken ti panangduktalda no ania ti motibo iti pammaltog.
