VIGAN CITY – Dua nga aldawen a mapukpukaw ni Bryan Susa, agtawen ti duapulo ket pito, mangngalap a taga-Sitio Puntaverde, Barangay Puro, Magsingal ta saanen a nakaawid manipod panagkalapna idi Sabado, Enero 7.
Iti pannaki-uman ti Bombo Radyo Vigan ken ni Adan Ulabia a kadua ni Susa a napan nagkalap, nadadaelan ti bangka ni Susa idi addadan iti maika-tallopulo ket innem a milya iti kabaybayan ta naidungpar iti kayo iti bangkana isu nga inkeddengna a sumina laengen kadakuada ket impagarupda a mapan iti as-asideg.
Segun ken ni Ulabia, gapu ta natalekda a makaawid met laeng ni Susa ket pinanawanda ket napanda iti naad-adayo tapno agkalap ngem idi nakaawiddan ket nagbalawda laengen ta saan pay a simmangpet.
VC – ADAN ULABIA
Inlawlawag ni Philip Ulabia nga idi sinaludsodda nu kabaelan pay ti bangka ni Susa ket simmungbat a mapan laengen iti agingga uppat a pulo a milya ket impagarupda nga addanto iti masalawna a padana a mangngalap iti nasao a paset iti kabaybayan.
Segun ken ni Philip, saanen nga umuna a gundaway a sinapulda iti kabaybayan ni Susa ta namin-anon a daras a napasamak daytan ngem ita laeng a saan a nakasubli nga insigida ngem namnamaenda a masapulan ni Susa iti paset ti Ilocos Norte kangrunaan idiay Pasuquin, Pagupud ken Burgos.
VC – PHILIP ULABIA
Gapu ti pasamak ket insigida a nakikammayet ni Barangay Captain Zaido Tabalanza ti Puro, Masingal kadagiti Coast Guard ken Municipal Disaster Risk Reduction Management Office (MDRRMO) para iti pannakasapul ni Susa kangrunaanen ti patta-pattaenda a lugar a nakadanonanna.
VC- BARANGAY CAPTAIN ZAIDO TABALANZA
Kabayatanna, ti kolor ti bangka ni Susa ket blue nga adda tatakna a BRYLE ADREI ken coast guard no. NWLSAL-031521-20005.
