VIGAN CITY – Agtultuloy iti imbestigasyon iti pannakatay ti maysa a mangisursuro ta napaltogan iti Abra Ilocos Sur Road idiay Barangay Lipcan, Bangued, Abra.
Ti biktima ket nabigbig a ni Rudy Steward Dugmam Sayen, agtawen iti tallopulo ket walo, mangisursuro iti Suyo National High School iti Pidigan, Abra nga agnaed idiay Zone 4, Bangued, Abra idinto a saan a nabigbig dagiti suspek.
Nakaawat iti tawag dagiti kameng ti Bangued Municipal Police Station manipod concerned citizen inaig iti pammaltog a napasamak iti nasao a lugar ket idi nakadanonda ket naipanen ti biktima iti Abra Provincial Hospital para iti pannakatamingna ngem naideklarar a natay.
Iti inisyal nga imbestigasyon, agturong iti pagadalan ni Sayen bayat a nakalugan iti motorsiklona a blue black Honda click 125i idi sinaruno dagiti saan pay a nabigbig a suspek a naglugan ti motorsiklo ket pinaltoganda iti namindua a daras a nakatamaan iti ngato a paset ti akin-kannigid a likod ken tengnged ti biktima.
Naglibas met nga insigida dagiti suspek a nagturong iti Barangay Santa Rosa, Bangued, Abra babaen ti motorsikloda isu a manarimaan iti hot pursuit operation para iti pannakabigbig ken pannakakemmeg dagiti suspek.
