VIGAN CITY – Napadayawan kas Bigueño Teacher of the Year iti secondary level ni Raymond Florendo, maysa a mangisursuro iti Ilocos Sur National High School iti napasamak nga Education Night a paset ti selebrasyon ti Vigan City Fiesta ken Longganisa Festival.
Iti pannaki-uman ti Bombo Radyo Vigan ken ni Florendo, saanna a ninamnama a maawatna ti nasao a pammadayaw agsipud ti panangibilangna iti bagina nga ordinaryo a mangisursuro iti nasao a pagadalan.
Inlawlawagna a ti panagpili iti Outstanding Bigueño Teacher of the Year ket adda mapili iti kada department ti pagadalan nga isuda ti agbibinnalubal ket manipud iti siam a department ti ISNHS ket adda laeng maysa a mangabak a mailaban para iti Bigueño Teacher of the Year.
Pinaneknekan ni Florendo nga iti baet ti pandemya ket nagtultuloy dagiti aktibidad nga inaramidna kas ti panangisayangkatna iti Regional Youth Forum ti Boy Scout of the Philippines a babaen daytoy ket mayebkas dagiti boy scout dagiti arapaapda.
Malaksid ti dayta, adda pay PANAGASA project wenno ti Panagadal Sangkarubaan nga inwayatna a ti gagemna ket matulongan dagiti agad-adal a marigatan iti panagadalna kasta payen nga adda ti Banuar project a ti met gagemda ket maikkan iti facemask ken faceshield dagiti frontliner.
