VIGAN CITY – Nagsagaba iti dunor ti pungwa-pungwanna ti maysa a lalaki a tinagbat ti amana idiay Barangay Quezon, Cabugao.
Nabigbig ti biktima a ni Rowel Suetos Urian, agtawen iti tallopulo ket siam, chief tanod, taga-Barangay Quezon, Cabugao idinto a ti suspek ket ni Elmer Jaina Urian, agtawen iti innem a pulo ket dua.
Aglutluto ti biktima iti uneg ti pagtaenganda idin ta aglaaw-laaw ti suspek iti ruar.
Rimuar ti biktima a napan nanganawa iti amana agingga nga adda ti saanda a nagkinnaawatan ket tinagbat ti suspek iti naminsan ti biktima a nakadunoran ti akin-kannawan a pungwa-pungwanna.
Naipaagas iti ospital ti biktima para iti pannakatamingna idinto a ti suspek ket nakakustodian iti Cabugao Police Station para iti proper disposition.
Daan a susik ti motibo ti insidente a napakaro gapu iti kinabartek.
