VIGAN CITY – Naipaagas ti maysa a lalaki a napaltugan iti sangwanan ti Abaya Mini Grocery, Barangay San Antonio, Candon City, Ilocos Sur.
Nabigbig ti biktima a ni Jun-Jun Galoy Ronquillo, agtawen iti tallopulo ket maysa, taga-Block 7, Barangay San Jose, Candon City idinto a dagiti suspek ket tallo a lallaki a saan pay nga ammo ti pakabigbiganda.
Maibasar iti pakpakauna nga imbestigasyon, umin-inomda ti kaduana ti biktima iti nasao a lugar idin ta dagiti tallo a lallaki nga umin-inom met laeng ket sinaludsodda no taga ano ti biktima ken ti kaduana.
Insungbat met ti biktima a “Sikayo, taga-anokayo, saankayo met a taga-ditoy” puon ti nabara a patangan iti nagbaetanda agingga nga immasot ti maysa a lalaki iti paltog ket pinaltuganna iti namin-dua a daras ti biktima sa da naglibas usar ti four wheels van da.
Nagsagrap ti biktima iti tama ti paltog ti agsinnumbangir a tyanna ken limsut ti buli iti akin-kannawan a takyagna, a naipaagas iti ospital para iti naan-anay a pannakatamingna.
