VIGAN CITY – Masapsapul kalpasan a nayanud ni Conrado Bautista iti Chico River idiay Barangay Ambalayat, Tagudin, Ilocos Sur gapu ti bigla a panagdakkel ti danum iti karayan.
Iti pannaki-uman ti Bombo Radyo Vigan ken ni Brgy. Captain Moises Lambinicio iti Brgy. Ambalayat, Tagudin, nagtultuloy iti panagtudo idi kalman a gappuanan ti panagpangato ti danum iti karayan nga ayan ni Bautista kaduana ti dua pay a lallaki ta binantayanna ti kalapna.
Segun ken ni Kapitan Lambinicio, in-inut a dimmakkel ti danum isu nga inkeddengdan nga agawid ngem kellaat a pimmigsa iti ayus ti danum a gappuanan ti pannakaiyanud ni Bautista idinto a dagiti dua ket nakalasat.
Naikiddaw kadagiti makakita nga ipakaammoda nga insigida kadagiti pannakabagi ti linteg wenno itawag kenkuana.
Nabilin met dagiti amin a barangay tanod idi rabii a bantayan ti masakupan ti nasao a barangay para ti kinatalged dagiti agindeg.
Kabayatanna, kiddaw ti kapitan iti insigida a pannakasimpa iti hanging bridge tapno adda ti paglasatan dagiti agindeg nu kayatda a makalasat iti karayan ken tapno awan ti maisagmak a kalugaranna.
