Natukkol ti ramay ti maysa a lalaki a biktima iti pannagbat idiay Barangay Remedios, Cervantes, Ilocos Sur.
Nabigbig ti biktima a ni Richard Vasques, agtawen iti uppat a pulo ket tallo idinto a ti suspek ket ni Marvel Lapayan Lacaden, agpada nga agnaed iti nasao a lugar.
Nagreport ni Ariel Vasquez iti Cervantes Police Station a ti kabsatna ket natagbat iti uneg ti pagtaenganda.
Segun iti witness a ni Loreto Lacaden, nabartek a napan ti suspek iti pagtaengan ti biktima a nagprobokar ken nagisawang kadagiti agkakadakes a balikas.
Nangala iti stick a kayo ti biktima ken napanna sinangat ti suspek, ngem bigla nga inasot ti suspek ti bunengna ket tinagbatna ti biktima sa naglibas.
Natukkol ti ramay iti akin-kannigid nga ima ti biktima a naipaagas iti ospital para iti pannakatamingna.
Maisaysayangkat met ti hot pursuit operation para iti pannakakemmeg ti suspek.
