VIGAN CITY – Nasarakan idiay Sitio Baliw, Barangay Quezon, Cabugao, Ilocos Sur nga awan biagna ni Crispin Cinco Serna, agtawen iti innem a pulo ket tallo, agnaed iti Barangay Caellayan iti nasao nga ili.
Iti pannaki-uman ti Bombo Radyo Vigan ken ni PMaj. Ramill Llarenas nga Officer-in-Charge iti Cabugao Municipal Police Station, mapan koma agibelleng iti nasao a lugar ti maysa a menor de edad a taga-Pug-os, Cabugao idin ta nadlawna nga adda natinnag a natay a tao iti derraas iti asideg iti kalsada.
Segun ken ni Llarenas, naduktalanda nga adda iti dua a bagsul iti barukong ti biktima ken adda dunor iti tengngedna.
Patien dagiti otoridad a secondary crime scene iti nakakitaanda ti biktima ta awan iti aniaman a senyales iti aglawlaw nga isu nangpatayanda isu a patta-pattaenda a naipan laeng ti biktima kalpasan ti krimen a naaramid kenkuana.
Naudin a nakita ti biktima idi January 18 ken nagpukaw iti uppat nga aldaw.
Ti bangkay ket nabigbig babaen iti kabsatna a lalaki a ni Juan Sinco Serna.
Nupay kasta awan iti aniaman nga isyu a nakainaigan ti biktima ta awan ti karirririna idi kallabes ngem nalaing laeng nga aginom.
Agtultuloy met ti imbestigasyon dagiti pannakabagi ti linteg no ania ti nakatayan ti biktima.
VIDEO OF PMAJ. RAMILL LLARENAS
