VIGAN CITY – Saan a namnamaen ti maysa nga ina a pumusay ti anakna gapo iti pannakalmes idiay Brgy. Nagpanaoan, Santa.
Nabigbig ti biktima a ni Alberto Tugado agtawen ti dua pulo ket lima ken agnaed ti Brgy. Lubong, San Vicente.
Iti pannaka-uman ti Bombo Radyo Vigan kenni Expedita Tugado, saan na a namnamaen ti pasamak ta iti impakada kenkuana ni Albert ket mapan agrides kaddua dagiti barkadana.
Sakbay ti pannakalmes ti anakna manarimaan idi nga aglablaba ti bigatna agingga adda iti nangdagas kenkuana tapno mapan agparti ti baboy.
Nakigtotda laengen idi makaawatda ti tawag a mapukpukaw ni Albert ken sakbay a napukaw ket adda iti nakakita kenkuana nga agpaypayapay nga agpapaarayat ngem ti ammuda ket malokloko.
Pinasingkedan ni Expedita a saanna nga ammu iti aglangoy ti anakna iso a masdaaw no apay a napan simmurot a nagdigos ti karayna.
