VIGAN CITY – Maysa a lalaki iti nakemmeg gapu iti pananglimlimona iti maysa nga agtagilako iti Vigan City Public Market, Barangay VIII, Vigan City, Ilocos Sur.
Segun ti Vigan City Police Station, ti biktima ket ni Dianne Fernandez Quezada, agtawen iti duapulo ket lima, naasawaan, vegetable vendor nga agnaed idiay Barangay IV, Vigan City idinto a ti suspek ket ni Ariel Aguilar dela Cruz, agtawen iti tallopulo nga agnaed idiay Barangay San Juan, San Carlos City, Pangasinan.
Kinuna ti biktima nga idi alas tres y media idi kalman, nagturong ti suspek iti vegetable store ken indiayana kenkuana ti panagorderna iti agduduma a klase iti nateng ken mani.
Imannugot ti biktima isu a nagorder iti sangagasut a kilo iti mani, maysa a gallon iti manteka, ken sanga-langgusti a pop corn nga aggatad amin iti P9,000 ket apaman a naawat ti suspek ti kuarta ket binagaanna ti biktima a mapanna alaen dagiti order iti cargo truck ngem napalabasen iti maysa nga oras ket saan pay a nagsubli.
Nagdudua ti biktima isu a pinakaammoanna ti asawana a ni Rommel Nuñez Quezada ken pinadasna a sapulen ti suspek idinto a nagturong ti biktima kadagiti otoridad a gappuanan ti panagrespondeda ken panangisayangkat ti hot pursuit operation a nakakemmegan ti suspek.
Naipan ti suspek iti Ilocos Sur Provincial Hospital – Gabriela Silang para iti medical examination ngem kalpasanna ket naipan iti PNP station para iti proper disposition ken documentation.
