VIGAN CITY – Sumango iti kaso a grave threat ti maysa a lalaki a nagpabasul ken nagipaturong iti paltog iti maysa met laeng a lalaki idiay Barangay Arnap, San Ildefonso, Ilocos Sur.
Nabigbig ti suspek a ni Domingo Alamar Madriaga, addan iti husto a tawen, taga-Barangay An-anna West, Bantay.
Ti met biktima ket ni Mariano Madriaga Pamo Jr., agtawen iti limapulo ket innem, taga-Barangay Arnap, San Ildefonso.
Nagturong ti biktima iti San Ildefonso Police Station tapno ipakaammo a pinangtaan isuna ti suspek.
Sakbay ti pasamak, alas kuatro bainte iti malem ti June 22 idi napan ti nagpainom ti biktima kadagiti tarakenna a baka, idin ta nakita ti suspek ket bigla a pinukkawanna ken pinabasulna nga isu ti nangikkat iti aladda.
Sinungbatan ti biktima a saanna nga inaramid ti ipabpabasul ti suspek ngem nagtultuloy ti panagkariar ti suspek a nangasot iti caliber 45 a paltog manipud iti bakrangna ket impaturongna iti biktima.
Nakigtot ti biktima ket timmaray bayat ti panagpukpukkawna nga agsublinto.
Timmaray met ti suspek babaen iti E-bike na ken ti paltogna a nagturong iti laud a direksyon.
