VIGAN CITY – Dunor iti ulo ken natukkol ti akin-kannawan a saka ni Manuel Barnachea Leal, agtawen iti innem a pulo ket tallo, mannalon, agnaed idiay Barangay Lacong, Tagudin gapu iti pannakadungparna iti motorsiklo a Honda Click 125 a minaneho ni Christienne Paul Lastimosa Labador, agtawen iti duapulo ket uppat, baro, awanan ti drivers license nga agnaed idiay Barangay Sawat, Tagudin.
Maibasar iti CCTV footage, agpapalaud a direksyon ti nagmotorsiklo ken sumrek iti provincial road idiay Barangay Lacong Tagudin idin nadanonda iti nasao a paset ket nagballasiw ni Barnachea iti kalsada manipod bagatan nga agpa-amianan a gappuanan ti pannakadungparna.
Gapu ti sinagaba ti nagmotorsiklo ket naipan iti Ilocos Sur District Hospital, Bio Tagudin para iti pannakatamingna.
Kabayatanna, awan ti helmet ti driver ti motorsiklo idi napasamak ti aksidente ngem saan a naka-inom iti arak idinto a ti pedestrian ket naamoan a nakainom idi napasamak ti aksidente.
