VIGAN CITY – Agpada a Dead on Arrival ti dua a nakuryente iti ili ti Santiago ken Sta. Maria, Ilocos Sur.
Ti immuna a nakuryente ket ni Gerry Corpuz Ellorin, agtawen ti limapulo ket maysa, naasawaan nga agnaed idiay Brgy. Salincub, Santiago.
Nakaawat ti Santiago Municipal Police Station iti report nga adda nakuryente ti nasao a lugar isu a nagrespondeda ket naamwan nga iti alas kuatro y media iti October 16 ket mapapati a naigganan ti biktima iti maysa a wire a gappuanan ti pannakapukaw ti puotna.
Naipan ti biktima iti Candon City Hospital, Candon para ti pannakatamingna ngem naideklarar a natay babaen ti attending physician-na.
Simmaruno a nakaawat ti report iti Sta. Maria Police Station iniag ti pannakakuryente ti agtawen ti sangapulo ket pito a Grade 12 Student nga agnaed idiay Brgy. Gusing, Sta. Maria.
Segun ti ama ti biktima a ni Edgar Flores Villarus, kalpasan ti panagdigos ti biktima ket naayaban a mapan mangan isu a napanna innala ti electric fan ti kuartoda ken impanna iti kusinada ket idi isaksakna tapno pamagaanna ti buokna ket aksidente a nakuryente.
Naipan ti biktima iti Ilocos Sur District Hospital, Narvacan ngem indeklarar a natay babaen ti attending physician-na.
