VIGAN CITY – Naipaagas iti ospital ni Marvin Ambagued Singaben, agtawen iti uppat a pulo ket walo, agnaed iti Barangay Poblacion, Banayoyo gapu ti pannakabagkongna idiay Tomila’s Agri Supply, Barangay San Jose, Candon City.
Nabigbig ti suspek a ni Danilo Javillo Lagmay, agtawen iti uppat a pulo ket tallo, agnaed iti Barangay Suyo, Sta. Cruz.
Maibasar iti CCTV footage, napan ti suspek iti Tomila’s Agri Supply ket napan iti counter table a nangala iti getteng a nakaiparabaw iti lamisaan.
Nagur-uray ti suspek iti entrance ti nasao nga Agri Supply agingga a dimteng met ti biktima.
Bayat ti kaadda ti biktima iti uneg ti establisimiento, nagkatawa ti suspek isu a dinamag met ti biktima no ania ti katkatawaanna.
Simmungbat ti suspek iti “Apay garud” ket sipud dayta, binaybay-anen ti biktima ngem kalpasan ti sumagmamano a gundaway, nagvideo ti suspek ket pinasardeng met daytoy ti biktima babaen ti panangpindotna iti cellphone nga inaramat ti suspek.
Sipud dayta, rimsua ti riri iti nagbaetan ti suspek ken biktima ket inasot ti suspek ti getteng iti bulsana nga isu ti imbagkongna iti namin-ano a daras iti biktima.
Pinadas ti biktima ti bumales agingga idi magundawayanna ti umadayo ken nangipaagas ti bagina iti ospital idinto a ti suspek ket naglibas.
