VIGAN CITY – Dead on Arrival ni Ryan Hidalgo Tugay, agtawen iti tallopulo ket siam, naasawaan, mannalon nga agnaed idiay Brgy. Uso, Suyo, Ilocos Sur ta nagbekkel.
Segun iti Suyo Municipal Police Station, nakaawatda ti report inaig ti panagbekkel ti maysa a lalaki ti nasao a lugar isu a nagrespondeda ket nakitada ti biktima a nakabitin iti Palongboyen a kayo a nakabitin babaen ti tali.
Insigida a naipan ti biktima iti Ilocos Sur Distric Hospital, Bio, Tagudin para iti medical attention ngem naideklarar a dead on arrival babaen ti attending Physicianna a ni Dr. Jerome Agub.
Maibasar ti naisayangkat nga imbestigasyon, iti alas otso ti bigat idi kalman ket napan ti biktima idiay Suyo proper tapno tulongan ti nagannakna a nagbagkat iti sako ti irik.
Nupay kasta iti ala una iti malem ket inuray isuna ti nagannakna para iti pannanganda ti pangaldaw ngem napaay a nagsubli.
Iti alas tres y media iti malem iti isu met laeng nga aldaw, nakita ti putotna a lalaki nga agtawen ti sangapulo ket lima ken kaanakanna a nakabitin ti biktima nga awanen ti puotna.
Pinasingkedan ti asawana a ni Alice Pagatpat Tugay a ti biktima ket kanayon nga agmaymaysa ken dadduma ririenna ni Alice nu nakainom.
