VIGAN CITY – Mapapati a nalmes iti Sived Beach ti Barangay Sived Sto. Domingo ni Arlan Molina, agtawen iti duapulo ket uppat, agnaed iti Barangay San Pablo iti nasao nga ili.
Nagresponde dagiti kameng ti nasao nga istasyon kaduada dagiti personnel ti Bureau of Fire Protection, Municipal Disaster Risk Reduction and Management Office manipud iti concerned citizen maipanggep iti napasamak a pannakalmes iti nasao a lugar.
Segun ken ni Mark James Torrano Incillio, agtawen iti duapulo ket maysa, agnaed iti nasao a lugar, inawis isuna ti biktima nga aglangoy sakbay a mapanda iti balayda ket kalpasan ti sumagmamano a minutos, ginuyod isuna iti napigsa a koriente ti danum iti adalem a paset ti kabaybayan.
Pinadas ni Mark James nga isalakan ti biktima ngem saan a nagballigi isu a dagus met a nagpaarayat.
Kabayatanna, mapapati nga agpada a nakainom ti biktima ken ti gayyemna.
