VIGAN CITY – Nasarakan a bangkay ni Josefh Dwayne Jordan, agtawen iti sangapulo ket siam, service crew a taga-San Juan, Sta. Lucia.
Iti pannaki-uman ti Bombo Radyo Vigan ken ni PSMS. Nestor Cacpal, rabii iti March 10 ket binisita ti biktima a mapapati a nabartek ti gayyemna a ni Gerald Loreto, agtawen iti duapulo iti kaserana nga isu payen ti nagturoganna.
Alas sais iti agsapa ti March 11, riniing ni Loreto ti biktima ngem saan a nakariing isu a nagpaarayat iti stepfather-na a ni Jose Randy Dinglasan tapno ipanda ti biktima idiay Sta. Lucia District Hospital ngem naideklarar a dead on arrival.
Awan ti dunor ti biktima ken mapapati a natay gapu ti Cardio-respiratory arrest ngem nupay kasta, naikiddaw ti pannakaidalan ti bangkay ti biktima iti autopsy tapno maduktalan ti husto a nakatayanna.
