BOMBO VIGAN – Nakemmeg ti maysa a lalaki iti naiyuswat nga Anti-Illegal Drug Operation iti Barangay Poblacion West, San Ildefonso.
Nabigbig ti suspek a ni Marlo Dela Cruz Lim, agtawen iti uppat a pulo ket pito, naasawaan, residente iti Barangay Anonang Menor, Caoayan, maysa a Regional PDEA Target List Top 1 iti salinong ti COPLAN “Bulto”.
Iti pannaki-uman ti Bombo Radyo Vigan kenni Police Captain Alberto Ramos Jr. iti San Ildefonso Municipal Police Station, dimmalan iti “test buy” ti suspek, tapno makumpirmaran nga aglaklako isuna iti droga, ket idi nakumpirmaranda, dita metten a naplano iti pannaka tiliw na.
Naala kenkuana ti nasurok-kumurang sangapulo a gramo ti shabu nga aggatad iti P68,000, ken drugs paraphernalia.
Basar met iti intelligence report, bulto-bulto dagiti ilak-laku ti suspek nga aggapu Manila, a maidis-distribute ditoy probinsiya.
Segun kenni Ramos, agtul-tuloy iti imbestigasyon ken interrogation-da iti suspek tapno maamwanda no sino pay dagiti kakadduana, ken naggapuanna dagiti illegal a droga.
Nagballaag met ni Ramos kadagiti agar-aramat iti illegal a droga nga isardeng-dan, ken agtultuloy latta iti panangisayangkat da iti anti-illegal drugs operation.
