VIGAN CITY – Natay gapu iti panagbekkelna ni Jansel Racca Raboy, agtawen iti tallopulo ket dua, mannalon, tubo iti Barangay Rugsuanan, Vigan City ngem agnanaed iti Barangay Maratudo, Magsingal.
Segun iti asawa ti biktima a ni Criselda Dumadag Raboy, agtawen iti duapulo ket walo, alas siete y media iti rabii ti April 9 idi adda saanda a nagkinnaawatan ti asawana a nanggandat nga agpakamatay ngem naigawidna.
Nupay kasta, binagaanna ti asawana nga agawid idiay Barangay Rugsuanan ngem ni Criselda kadua dagiti tallo nga annakna ket napan iti pagtaengan ti inana.
Ngem idi nagawid ni Criselda iti agalas sais iti agsapa ita nga aldaw, nasarakanna ti asawana a nakabitin babaen iti tali isu a dagus met a nagpaarayat.
Naitaray ti biktima iti ospital ngem naideklarar a dead on arrival.
