VIGAN CITY – Daan a susik ti mapapati a rason ti nangpaltugan ni John Pamani Tomas, agtawen iti limapulo ket dua, agnaed iti Pantay Tamurong, Caoayan iti kayongna.
Nabigbig ti natay a biktima a ni Orlando Quindipan Astrologio, agtawen iti pitopulo, agnaed iti nasao a lugar.
Iti pannaki-uman ti Bombo Radyo Vigan ken ni Police Captain Allan Reoliquio, nakangngeg iti putok ti paltog ti asawa ti biktima isu a dagus a rimuar ket nakitana ti asawana a nakatakder ken mangig-iggem ti dara-dara nga ulona kasta pay a nakitana ti kabsatna a timmaray nga adda iggemna a paltog.
Naitaray iti ospital ti biktima idinto a nangisayangkat met dagiti pannakabagi ti linteg iti hot pursuit operation a nakatiliwan ti suspek.
Segun pay ken ni Reoliquio, datin nga adda nagrir-ririan ti suspek ken biktima ta idi kallabes ket adda intensyon ti biktima a dungparen ti suspek.
Malaksid dayta, ti suspek ti pabpabasulenda a mangub-ubor iti balay ti biktima ta no makainom ket masansan ti panagprobokarna ngem napagpatpatanganda met dagitoy a ririda idi kallabes.
Iti agdama, dukduktalen dagiti pannakabagi ti linteg no ania a paltog ti inaramat ti suspek a mapilaan iti kaso a murder.
