VIGAN CITY – Kaso a serious physical injury ti sangwen ni Ruben Sonico, agtawen iti uppat a pulo ket lima, mannalon nga agnaed idiay Brgy. Catucdaan, Cabugao gapu iti panangtagbatna iti rupa ti kayongna.
Nabigbig ti biktima a ni Joel Saporna, agtawen iti uppat a pulo ket uppat, mannalon, agnaed met laeng iti nasao a lugar nga agpapalaing itan iti ospital.
Iti pannaki-uman ti Bombo Radyo Vigan ken ni P/Capt. Franco Catalan, kayat ti biktima nga alaen ti daga a taltalunen ti suspek nga isu ti datin a pagap-apaanda isu a di masangpetan ti suspek ti biktima nga agiinom ket napasamak ti pannagbat a nagsagabaan ti nakaro a dunor ti agong ti biktima a naipaagas iti Pira Clinic and Hospital.
Ginandat ti suspek nga aglibas ngem boluntaryo met laeng a simmuko kadagiti pannakabagi ti linteg idi nadanunda nga agpadpadanum iti kataltalonan.
Naala kenkuana ti buneng a naaramat iti pannagbat ken mayuray ti pinal a panagpapatang agsipud ta awan met ti sabsabali kadakuada.
