VIGAN CITY – Panaglabsing iti Republic Act 10591 ti sangwen a kaso ni Joshua Paiste, agtawen iti duapulo, baro, estudyante nga agnaed idiay Tay-ac, Bantay gapu ti iligal a panagikotna iti paltog.
Nakaawat ti tawag dagiti kameng ti Bantay Police Station manipod ken ni Brgy. Capt. Jose Madriaga idiay Brgy. Tay-ac, Bantay a nangipakaammo a nagikot ti short firearm ti suspek iti barangayda kangrunaan iti basketball court idiay Sitio Pinto isu a nagrespondeda ket naamoanda nga adda panagkabil a nakairamanan ti suspek ta adda iti nangala iti tulbek ti motorsiklona.
Nagawid ti suspek ngem nagsubli met laeng nga addaan ti ikotna a 9mm pistol a kukua ti amana.
Nupay kasta nalapdan ni Ronald Patubo nga uliteg ti suspek a nagikot ti paltog a nai-turn over iti Bantay Police Station.
Iti agdama, addaan ti kustodiya iti pannakabagi ti linteg ti paltog para iti documentation ken proper disposition idinto a ti suspek ket naipan ti Gabriela Silang General Hospital para iti medico-legal examination.
