VIGAN CITY – Dunor iti tyan ken nadumaduma pay a paset ti bagina ti sinagrap ti maysa a lalaki a binagkong ti kabsatna idiay Barangay Apatot, San Esteban.
Nabigbig ti biktima a ni Perfecto Diga Ramirez, agtawen iti tallopulo ket pito, construction worker idinto a ti suspek ket ni Walter Diga Ramirez, agtawen iti limapulo ket dua, agpada nga agnaed iti nasao a lugar.
Maibasar iti imbestigasyon, simmangpet a nakainom ti biktima iti pagtaenganda idinto a nakainom met laeng ti suspek.
Nagpimpinnatang ti suspek ken biktima agingga rimsua ti saanda a pagkinnaawatan ket nagdinnanugda.
Nangasot met ti suspek iti kutsilyo ket binagkongna ti biktima a nakadunoran ti akin-kannawan a paset ti tyanna ken dadduma pay a paset ti bagina.
Naipaagas iti ospital ti biktima para iti pannakatamingna idinto a nakemmeg met ti suspek.
Narekobre ti kutsilyo nga agatiddug iti sangapulo ket lima a pulgada, karaman ti apputanna.
