VIGAN CITY – Nakemmeg ni Elmer Cabaltera Tomas, agtawen iti duapulo ket walo gapu ti aksidente a pannakapapatayna iti kabsatna a ni Chris Porbedencia Tomas, agtawen iti duapulo ket siam, agpada a taga-Barangay Cabaroan, Sta. Catalina.
Iti pannaki-uman ti Bombo Radyo Vigan ken ni Police Captain Marlon Martinez, agin-inom ti suspek ken biktima iti uneg ti pagtaenganda idin ta rimsua ti saanda a pagkinnaawatan ket nangala ti biktima iti kustilyo ket tinengngelna ti kabsatna.
Gapu dayta, innduron ti suspek ti biktima ket aksidente met a naipakpak ti ulona iti semento isu a naawanan ti puot ken puon ti nakatayannan.
Iti agdama, addan ti suspek iti kustodia ti Sta. Catalina Police Station tapno dumalan iti husto a proseso.
Pinasingkedan met ti ina dagiti agkabsat a no mabartek ti biktima ket kasdiay ti tabasna a makainom ngem saanna a dangran ti kabsatna.
Kabayatanna, kitkitaen met dagiti pannakabagi ti linteg no iramanda nga ipila ti liquor ban kontra iti suspek.
Nupay kasta, mabalin a saanen nga agipila ti pamilia iti kaso kontra iti suspek ta kunana a simpaendanto met laeng ti napasamak nga insidente.
