Maysa a lalaki a napukawan iti bisikleta, maipaayan iti baro babaen ti maysa a naayat a residente

VIGAN CITY – Maipayaan iti baro a bisikleta ni Mario Tabula Sr. a taga Nagpanaoan, Santa ta adda naimbag ti nakemna a nangidiaya kenkuana manipud iti ili ti Bantay ngem saanen a nagpainagan.

Dayta ket kalpasan ti pannakapukaw ti bisikleta ni Tabula a nakaparking iti asideg ti pagtrabtrabahoanna.

Iti pannaki-uman ti Bombo Radyo Vigan ken ni Tabula, alas syete iti agsapa idi napan nagtrabaho ket iti alas onse iti agsapa, awanen ti biskleta na iti nangiparkinganna.

Kunana nga adda nakakita nga innala ti maysa a Muslim a nakaabungot ti puraw, naka-Tshirt ti yellow ken naka-puraw a longsleve.

Immunan a kiniddaw ni Tabula a maisubli ti bisikletana ta isu laeng ti pagluglugananna no mapan agtrabaho.