VIGAN CITY – Sapsapulen dagiti pannakabagi ti linteg ni Henry Yago, agtawen iti innem a pulo ket maysa, Traffic Enforcer a taga Brgy. Tubigay, Sinait gapu iti mapapati a panagtakawna kadagiti materyal a mausar iti manarimaan a construction ti kalsada iti nasao nga ili.
Impakaammo kadagiti pannakabagi ti linetg ni Edwin Ramos, agtawen iti limapulo, foreman ti FYI Construction a taga Brgy. Macatcatud, Magsingal nga idi April 18 ket mapapati a nagala iti construction materials ni Yago.
Inimbestigaran dagiti pannakabagi ti linteg ken segun iti witness a ni Winnie Incillo, agtawen iti tallopulo ket walo, taga Brgy Tubigay, agarup 11:30 iti rabii idi April 18, kabayatan ti kaaddana iti ruar ti balayda ket nakitana ti suspek a mangal-ala iti landok nga inluganna iti electric bike na ken saanen nga ammo no napananna.
Narekobre met laeng dagiti naala a materyales a buklen ti sangapulo ket walo a piraso ti landok a mapatta-patta nga aggatad iti PHP1,200.
Addan iti kustodiya ti Sinait Police station dagiti narekobre a banag para iti proper documentation ken disposition.
