VIGAN CITY – Nadunor ti maysa a lakay ken ti apona gapu iti pannakaitinnag ti naglugananda a traysikel idiay Arab, Pidigam Abra.
Nabigbig ti biktima a ni Simplicio Cardona, agtawen ti innem a pulo ket pito ken ti apona nga agtawen ti sangapulo ket dua nga agpada nga agnaed idiay Laplapog, Villaviciosa.
Agmanmaneho ti traysikel ni Cardona kadua ti apona idin ta saanna a nakontrol ti manibela ti luganna ket natnagda iti derraas a ti kaunegna ket sangapulo a metro.
Insigida a nagresponde dagiti kameng ti linteg iti Pidigan ken San Isidro tapno isalakan dagiti biktima nga itan ket agpapalaingdan iti balay pagagasan.
Nupay kasta, nagpalagip dagiti pannakabagi ti linteg kadagiti agmanmaneho nga agannad nangruna ita a nagalis ti nadalan gapu ti natudo a paniempo.
