VIGAN CITY – Balligi ti naisayangkat a search warrant operation a nakakemmegan ti maysa a lalaki nga agik-ikot iti paltog idiay Barangay Sulvec, Narvacan, Ilocos Sur.
Nabigbig ti subject ti operasyon a ni Edmund Jacob Albayalde, alyas Burnok, agtawen iti uppat a pulo ket maysa, High Value Individual iti PDEA Target List, agnaed iti Barangay Sulvec.
Naala iti uneg ti pagtaenganna ti maysa a unit ti hommade caliber 22 revolver nga adda tallo a piraso ti bala; uppat a piraso ti bala para iti caliber 45; ken maysa a dakkel a zip loc a naglaon iti mapapati a napagango a bulong ti marijuana ken tallo a piraso ti small heatsealed transparent plastic sachet a naglaon iti shabu.
Sangwen ti suspek ti kaso a panaglabsing iti Republic Act 9165 wenno Comprehensive Dangerous Drugs Act of 2002 ken panaglabsing iti Republic Act 10591 wenno Illegal Possession of Firearms and Ammunition Act.
