VIGAN CITY – Dead on arrival ni Barangay Captain Romeo Agliam Rabang Sr., agtawen iti innem a pulo ket tallo, taga-Barangay Conconig East, Sta. Lucia gapu ti panangpaltog ti saan pay a nabigbig a suspek idinto a nadunor met ti asawana a backrider a ni Veronica Reonal Rabang, agtawen iti innem a pulo ket tallo.
Iti pannaki-uman ti Bombo Radyo Vigan ken ni Police Major Jerylle Caranay, naggapu ti biktima ken ti asawana idiay Barangay Damacuag a nagbuya iti piesta ket agawidda koman idin ta kabayatan ti panagdalyasatda iti kalsada ket nakangngeg ti asawa ti biktima iti dua a nagsaruno a putok nga isu met ti pannakakitanan iti asawana a dara-dara.
Gapu dayta, dagus a nagpaarayat ti asawa ti biktima ket intaray met ti kabagayanna iti Ilocos Sur District Hospital -Sta. Lucia ngem saanen a nakalasat.
Nagsagrap ti biktima iti dua a tama ti paltog iti akin-kannigid a paset ti barukongna ken iti bukotna idinto a ti asawana a backrider ket nagsagrap met iti dunor iti akin-kannigid a takyagna.
Segun met iti nakaimatang iti pasamak, ti suspek ket nakalugan iti scooter a motorsiklo.
