VIGAN CITY -Nakemmeg babaen iti entrapment operation ti maysa a kameng ti LGBTQ a ni Rodel Quinatana Alquiza, agtawen iti duapulo ket siam, massage therapist, agnaed iti Barangay Salindeg nga agibugbugaw iti babbalasang.
Napasamak ti operasyon idiay Verzola Resto bar, Barangay Callaguip, Caoayan.
Narescue met dagiti pannakabagi ti linteg ti babai a biktima nga agtawen iti sangapulo ket walo nga isu ti maikatlo a naibugaw ti suspek sipud nangrugi ti operasyonna idi napan a tawen.
Iti pannaki-uman ti Bombo Radyo Vigan ken ni Police Captain Allan Reoliquio, maysa kadagiti kamengda ti nagpammarang a kliyente ket napagtulaganda iti suspek nga agsinnarak iti maysa a lugar iti nasao nga ili.
Kalpasanna, napan ti poseur-customer iti kuarto nga ayan ti biktima ken isu met ti gundaway a panangtawagna iti arresting officer.
Apaman a nayyawat ti tallo ribo a pisos a bayad iti suspek, isu met ti gundaway a pannakakemmegna.
Nupay kasta, kaso a human trafficking ti sangwen ti suspek ken nailatang ti dua gasut a ribo a pisos a pyansa para ti pannaka-wayawayana.
Nagpanawagan met ni Reoliquio kadagiti adda kastoy nga aramidna nga isardengdan ta numan pay daytoy ket nadaras a pamastrekan iti kuarta, madadael met ti biag dagiti babai a biktima.
