VIGAN CITY – Sumango iti kaso a panaglabsing iti Republic Act 9165 wenno Comprehensive Dangerous Drugs Act of 2002 ti sangwen ti maysa a kameng ti LGBT a nabuy-bust idiay Tamag, Vigan City.
Nabigbig ti suspek a ni Arnel Rosario, agtawen iti uppat a pulo ket siam, hairdresser a taga-Sitio Ranchito, Tamag, Vigan City, maysa a High Value Individual Top 1priority target ti Provincial level.
Iti pannaki-uman ti Bombo Radyo Vigan ken ni PCol. David Dulnuan, nakurang nga uppat a bulan a sinipsiputanda ti suspek iti iligal nga aramidna sakbay a naiwayatda ti operasyon.
Agduduma dagiti laklakwanna babaen iti pagtaenganda ken mapapati a maar-aramat pay ti parlor-na para kadagiti ka-transaksyonna.
Naala kenkuana ti uppat a plastic sachet ti shabu, maysa a shabu a nagserbi a buy bust item nga aggatad iti PHP27,200, tallo ribo a pisos a buy bust money, ken PHP480 a nakaikarga iti bulsana.
Nakakustodian ti suspek kadagiti pannakabagi ti linteg tapno dumalan iti husto a proseso.
