VIGAN CITY – Nakemmeg ti maysa a lalaki iti buy bust operation idiay Sitio Calawaan, Barangay Tamurong, Sta. Catalina.
Nabigbig ti suspek a ni Jimmy Unabia Lucero, agtawen iti duapulo ket uppat, construction worker, agnaed iti Buquig, Bantay a nailista kas High Value Target iti salinong ti COPLAN KARIMBWAYA, CG Member iti Sarsi-Baclig Drug Group, Top 10 Regional Priority Target ken PDEA Target List.
Naaktuan ti suspek a nagilako iti poseur buyer iti maysa a heat-sealed transparent plastic sachet a naglaon iti napagango a bulong ti marijuana nga isu ti nagserbi kas buy bust item.
Malaksid dayta, naala pay manipud iti ikot ti suspek ti maysa a piraso ti genuine PHP500 bill a nagserbi kas buy bust money, innem a piraso ti medium heat-sealed transparent plastic sachet a naglaon iti maatap a napagango a bulong ti marijuana, tallo a small heat-sealed transparent sachet a naglaon iti mapapati a napagango a bulong ti marijuana a 55 grams ken agbalor iti PHP6,600.
Sangwen ti suspek ti kaso a panaglabsing iti Republic Act 9165 wenno ti Comprehensive Dangerous Drugs Act of 2002.
