Nakemmeg ti maysa a high-value individual iti naisayangkat a buy-bust operation idiay Katipunan Street, Barangay Ayusan, Vigan City, Ilocos Sur.
Ti suspek ket Top 10 Regional ken Number 1 PDEA Provincial priority Target Lists nga agnaed idiay Barangay V, Vigan City.
Iti pannaki-uman ti Bombo Radyo Vigan ken ni PLt. Col. Reynaldo Mendoza Jr. manipod Vigan City Police Station, babaen iti panagtitinnulong dagiti pannakabagi ti linteg ket naala kenkuana ti mapapati a shabu nga agdagsen iti 2.5 a gramo nga aggatad ti P14,000; tallo a piraso iti plastic sachet, dua a piraso iti plastic bottle ken residue.
Segun ken ni Mendoza, ti suspek ket datin a nakemmeg gapu iti isu met laeng a kaso.
Iti agdama ket nakakustodiyan kadagiti pannakabagi ti linteg ket nakasaganan ti kaso a maipila kontra kenkuana ti salinong ti Republic Act 9165 wenno Comrehensive Dangeros Drugs Act of 2002.
