VIGAN CITY – Nakemmeg ti high value individual a Top 10 Regional Priority Target iti salinong ti PDEA Regional Target List idiay Brgy. Remedios, Cervantes.
Segun ti Sta. Cruz Municipal Police Station, nabigbig ti suspek ket ni Mark Anthony Castillo Garcia, agtawen ti duapulo ket siam, naasawaan a taga-Barangay Sagat, Sta. Cruz nga agdama nga agtrabtrabaho iti RUSI Motors Outlet idiay Barangay Rosario, Cervantes.
Babaen iti panagtitinnulong dagiti pannakabagi ti linteg iti naiwayat nga anti-illegal drug operation iti salinong ti COPLAN MAKMAK ket nakemmeg ti suspek ta naaktoan ti panagilakona iti maysa a bassit a heat-sealed transparent sachet a naglaon iti mapapati a shabu iti nagpammarang a poseur buyer.
Naala kenkuana iti dua a piraso iti sangaribo a pisos a nagserbi kas buy bust money, maysa a heat-sealed transparent plastic sachet a naglaon iti mapapati a shabu iti posisyonna, maysa a cellphone nga adda dua a sim card-na, sabali pay a dua a piraso iti sim card, maysa a motorsiklo ken tulbek iti motor.
Mapatta-patta a 0.79g iti kadagsen ti nasao a naala iti suspek nga aggatad iti P4,750.
Naipan ti suspek iti Cervantes Municipal Police Station pakairamanan ti naala kenkuana tapno dumalan ti husto a proseso.
