VIGAN CITY – Maysa a Grade 11 student ken maysa a menor de edad iti nagtakaw kadagiti baterya iti Partas Bus Terminal idiay Barangay Paras, Candon City.
Segun ti Candon City Police Station, dagiti suspek ket da Jomari Tejada Sumaquiab, agtawen iti sangapulo ket walo a Grade 11 student nga agnaed idiay Sitio San Jose, Barangay Calaoa-an, Candon City ken kaduana a maysa a menor de edad idinto a ti biktima ket ti Partas Bus Inc. Corp babaen ti panangibagi ni Nelson Agati De La Cruz, agtawen iti limapulo ket uppat, terminal supervisor nga agnaed idiay Barangay Bulala, Vigan City.
Kinuna ni De La Cruz nga idi kalman iti alas sais iti bigat ket nag-check kadagiti nakaparking a bus iti terminal ni Ariel Lopez Dominno, agtawen iti duapulo ket walo, naasawaan, mekaniko iti Partas, nga agnaed idiay Barangay Abaccan, Sigay idin napansinna nga uppat a bus iti mapukpukaw iti bateryana.
Apaman a naipakaammo ken ni De La Cruz iti pasamak ket naisayangkat iti inspeksyon ket naduktalan nga adda pito a piraso iti baterya iti mapukpukaw nga aggatad iti nasurok-kumurang P50,000.
Babaen iti insayangkat a follow-up operation dagiti otoridad ket nabigbig dagiti suspek isu a naipatungpal iti hot pursuit operation a nakakemmegan dagiti suspek.
Ti kadua ti suspek a menor de edad ket mismo a ti amana iti nangiturn-over iti Candon City Police Station ket nairefer iti women and children’s protection desk idinto a ni Sumaquiab ket addan iti kustodiya dagiti pannakabagi ti linteg.
