VIGAN CITY – Maysa nga Street Level Individual ti nakemmeg iti naiwayat a buy bust operation idiay Sitio Highway, Barangay Tablac, Candon City.
Nabigbig ti suspek a ni alyas Danny, agtawen iti limapulo ket siam, agnaed iti Barangay Langlangca 2nd, Candon City.
Iti pannaki-uman ti Bombo Radyo Vigan ken n PLT. Jerry Valdez, Investigation Officer ti Candon City Police Station, nabayagdan a sinipsiputan ken kinatran-transaksyon ti suspek sakbay nga inwayatanda iti operasyon.
Datin a natiliw gapu met laeng iti iligal a droga ngem nawaswas idin ti kasona.
Naala kenkuana ti innem a gramo ti shabu nga aggatad iti PHP40,800 a naipalaon iti innem a piraso ti transparent plastic sachet ti shabu.
Dagiti non drug evidence a naala ket pakairamanan ti duapulo a piraso ti one-thousand-peso ken uppat a piraso ti five-hundred-peso boodle money a nagserbi a buy bust money.
PHP8,250 a kuarta ti suspek, pitaka, sling bag, bond paper a nakaibungonan ti mapapati a shabu signature, cellphone, empty sachet ti transparent plastic sachet, driver’s license, voter’s ID, ken motorsiklo.
Sangwen ti suspek ti kaso a panaglabsing iti Republic Act 9165 wenno Comprehensive Dangerous Drugs Act of 2002.
