VIGAN CITY – Mapatta-patta a PHP17,000 iti gatad dagiti tinakaw dagiti saan pay a nabigbig a suspek iti Don Floro’s Drug Mart idiay Sinait Public Market, Brgy. Macabiag, Sinait.
Personal a nagturong iti Sinait Police Station ti biktima a ni Noel Jude Ilaban Ingel, agtawen iti duapulo ket pito, negosyante ken residente iti Barangay Ricudo, Sinait gapu kadagiti mapukpukaw iti pagtagilakwanna, isu a dagus a na-review dagiti CCTV ti store na, ket naduktalanan a manipud 10:33 AM agingga10:40 AM ti Hulyo 8 iti agdama a tawen, adda uppat a saan a nabigbig babbai nga agal-ala iti sumagmamano a banag ti nasao a patagilakwan, idinto dagiti dua a lallaki a saan a nabigbig ket nagserbi a look-out da.
Dagiti mapukpukaw ket pakairamanan ti lima a botelya ti Stresstabs nga aggatad iti PHP1,500; lima a botelya ti Caltrate nga aggatad iti PHP1,400; maysa a karton ti Snow Cap nga aggatad iti PHP1,700; uppat a karton ti Salonpas nga aggatad iti PHP3,000; walo a botelya ti Myra nga aggatad iti PHP2,800; maysa a karton ti Conzace nga aggatad ti PHP1,150; lima a botelya ti Centrum Advance silver nga aggatad iti PHP1,800; maysa a karton ti White Flower nga aggatad iti PHP1,500; maysa a botelya ti Methathione nga aggatad iti PHP2,500.
Iti agdama, nakikammayet ti Sinait Police Station iti sabali a pagtagilakuan para ti CCTV footage para iti posible a pakabigbigan ken naaramat a lugan dagiti suspek.
