VIGAN CITY – Dead on arrival ti driver ti maysa a tricycle gapu iti panangdungpar ti maysa a van iti national highway idiay Brgy. Sacuyya Sur, Santa, Ilocos Sur.
Segun ti Santa Municipal Police Station, nabigbig ti driver ti Mitsubishi Delica van a ni Cañaveral Galinato Jr., agtawen iti duapulo ket maysa, lalaki, prossesor iti PDL number nga agnaed iti Brgy. 35 Bil-loca, Batac City, Ilocos Norte; ti nagmaneho iti Honda TMX tricycle a ni William Barcelona Sr., addan ti husto a tawen nga agnaed iti Brgy. Sacuyya Sur, Santa, ken ti bystander a ni Justo de Peralta Jr., addan ti husto a tawen, ODU nga agnaed met laeng iti nasao a lugar.
Sakbay iti pasamak, agballasiw ti tricycle manipod daya a direksyon a mapan iti laud a paset iti kalsada idin dinungpar ti sumungad a van iti likodan a paset ti tricycle a gappuanan iti pannakaipanna iti laud a paset a nakairaman ni de Peralta.
Natinnag ti driver ti tricycle iti kalsada a gappuanan iti pannakadunor iti ulona idinto a nadundunor iti saka ni de Peralta.
Naipan iti Metro Vigan Cooperative Hospital ti driver iti tricycle ngem naideklarar a dead on arrival babaen ti attending physician a ni Dr. Mary Grace Morales idinto a ti bystander ket naipan iti Ilocos Sur Provincial Hospital-Gabriela Silang para iti pannakatamingna.
Kabayatanna, saan a naan-ano ti driver ti van nga itan ket adda iti kustodiya iti pannakabagi ti linteg.
