VIGAN CITY – Natalgeden ti kasasaad ni dati a Barangay Captain Emiraldo Dagdag Tamayo, residente ti Barangay Callitong, Burgos kalpasan ti panangpaltog kenkuana ti saan pay a nabigbig a suspek idiay Barangay Luna, iti nasao nga ili.
Iti pannaki-uman ti Bombo Radyo Vigan ken ni Police Captain Melvin Trinidad iti Burgos Municipal Police Station, nakalugan ti biktima iti motorsiklo ta mapan koma iti tiendaan gumatang idin ta nasabetna ti suspek a nakalugan met laeng iti motorsiklo ket pinaltuganna ti dati a kapitan iti naminpat a daras.
Innayon ni Trinidad nga iti agdama ket addan pamalpalatpatanda iti nasao a pasamak ken agtultuloy ti naun-uneg pay nga imbestigasyon.
Kiniddawna ti pannakitinnulong dagiti agindeg tapnu maikkan hustisya ti pannakapaltog ti biktima, ken mapagtalinaed iti urnos ken talna iti ili ti Burgos nangruna ta umadanin ti eleksion.
