VIGAN CITY – Agtultuloy ti imbestigasyon dagiti pannakabagi ti linteg iti napasamak a pammaltog idiay Barangay Bayubay Norte, San Vicente a nakatayan ni Renan Lofredo Revoltiado, agtawen iti uppat a pulo ket maysa, construction worker, agnaed iti Barangay San Julian Norte, Vigan City.
Iti pannaki-uman ti Bombo Radyo Vigan ken ni Ilocos Sur Police Provincial Director PCOL. JUGITH DEL PRADO, ireviewda dagiti CCTV footage tapnon makita ti pakabigbigan ti nagmotorsiklo a napaspas a pimmanaw manipud iti nakapasamakan ti pammaltog.
Karaman pay met kadagiti duktalenda no ania ti nagapuan ken napalpalabas nga aktibidad ti biktima sakbay a napaltugan.
Kunana nga idi January 25, 2019, naserbian iti search warrant iti kaso a panaglabsing iti Republic Act 10591 a nakakumpiskaran ti dua a caliber 22.
May 6, 2017 ket isu met ti pannakaipila idi kenkuana ti kaso a frustrated murder.
Kabayatanna, naala manipud iti nakapasamakan ti krimen ti nasurok PHP28,000, tallo a cellphone ken ti spent shell ti caliber 45 a paltog.
