VIGAN CITY – Nakemmeg ti maysa a construction worker gapu iti panagtakawna iti maysa a pasdek a kukua ti maysa a negosyante iti Barangay Tamag, Vigan City.
Segun ti Vigan City Police Station, ti biktima ket ni Tommy Paiste Javines, agtawen ti limapulo ket uppat, naasawaan, negosyante nga agnaed iti Brgy. Tamag, Vigan City idinto a ti suspek ket ni Nickson Villanueva Abejon, agtawen ti duapulo ket siam, addaan ti live-in partner, construction worker nga agnaed met laeng iti nasao a barangay.
Impakaammo ni Brgy. Captain Renato Rabot kadagiti pannakabagi ti linteg iti napasamak a panagtakawan iti barangayda isu a nagrespondeda ket naamoan a naserrek iti computer shop, billiard hall ken sari-sari store ti biktima a ni Javines.
Pwersa a dinadael ni Abejon iti wire fence iti tawa iti daya a paset ti pasdek a kukua iti karrubana a ni Javines ket innalana iti duapulo a pakete iti Marlboro ken Mighty Cigarettes nga aggatad iti P2,760; assorted groceries nga aggatad iti P1,000 ken kuarta nga aggatad iti P3,500.
Iti insayangkat a hot pursuit operation dagiti otoridad ket isun ti nakakemmegan ti suspek ken natakuatan dagiti innalana iti pagtaenganna iti maysa a pakete iti Marlboro ken dua a pakete iti mighty a sigarilyo; agduduma a shampoo ken sabon; ken barya nga aggatad iti tallogasut innem a pulo ket maysa.
Kabayatanna, nakakustodian ti suspek iti Vigan City Police Station ken maisagsaganan ti dokumento para iti pannakaipila iti kaso kontra kenkuana.
