VIGAN CITY – Naisayangkat ti search warrant operation iti pagtaengan ni Rio Vincent Estrella Chan, agtawen iti uppat a pulo ket dua, baro, construction worker nga agnaed idiay Barangay Ag-agrao, Sta. Maria, Ilocos Sur gapu iti panaglabsingna iti Republic Act No. 10591 ken Republic Act 9165.
Insayangkat dagiti pannakabagi iti linteg ti search warrant operation iti pagtaengan ti suspek a nakaalaan ti maysa a gramo iti mapapati a shabu nga aggatad ti P6,800 a naipan iti dua a piraso iti heat sealed transparent plastic.
Dagiti non-drug evidence a naala ket maysa a piraso iti empty plastic transparent, maysa a pakete iti sigarilyo ken tallo a piraso iti live ammunition ti caliber 45.
Awan ti suspek idi naisayangkat iti operasyon ngem immatangan iti operasyon dagiti barangay officials, Department of Justice representative, ken kabsat ti suspek a ni Ryan Chan, agtawen iti uppat a pulo ket dua, MDRRMO personnel ken agnaed met laeng iti nasao a lugar.
