VIGAN CITY – Maisagsaganan ti kaso a maipila kontra kadagiti miembro ti “SALISI” gang a nagtakaw iti nasurok maysa milion a gatad ti alahas ken kuarta iti Lucy’s Antique Shop, Calle Crisologo, Barangay I, Vigan City idiay Barangay 1, Vigan City.
Dagiti suspek a natiliw ket da Larry Montibon Igot, agtawen iti limapulo ket walo, agnaed iti Aguilar Street, Barangay 139 Bagong Bario, Caloocan City ken ni Jhane Soliman De Guzman, agtawen iti tallopulo, agnaed iti 133 Waling Waling Street Punta, Sta. Ana, Manila.
Masapsapul pay laeng met dagiti lima a kakaduada a nakalibas.
Iti pannaki-uman ti Bombo Radyo Vigan ken ni PLTCOL REYNANTE PITPITAN, naisublin dagiti banag a natakaw manipud ken ni Lucila Chan Barba, agtawen iti innem a pulo, negosyante, taga- Barangay 1, Vigan City ngem agdama nga agnanaed iti Barangay Bayubay Norte, San Vicente kalpasan a naala dagitoy manipud iti ikot ti suspek a maysa.
Maipalagip a simrek ti grupo dagiti agtatakaw iti establisimiento ti biktima ket kinapatpatangna ti maysa a suspek idinto a ti dua kadakuada ket innalada ti bag ti biktima a naglaon iti maysa nga iphone 13 nga aggatad iti PHP39,000, kuarta a PHP20K, check book, ken alahas nga aggatad amin iti PHP1,150,000.
Nupay kasta, binalakadan ni Pitpitan dagiti negosyante nga agridamda a nasyaat nangruna ta agraira ita dagiti agtatakaw.
